ഒരു പകലിൻ ശവമടക്കലിൽ
കത്തിയവസാനിച്ച പ്രതീക്ഷയുടെ ചിത.
രാത്രി നിഗൂഢതയിലലിഞ്ഞാലും
ഇനിയും തുടരുമീ രാപകലുകൾ.
എങ്കിലുമീ നിദ്രയിൽ കണ്ടു ഞാൻ,
പോയിന്റ് ബ്ലാങ്കിലെ
തോക്കു പോലെ സമധാനം.
ഇന്നലെകളും നാളെയുമില്ലാത്ത,
തുടക്കൊടുക്കങ്ങളില്ലാത്ത യാത്ര.
ശിരച്ഛേദം ചെയ്യപ്പെട്ടൊരു
മരത്തിൻ കീഴെ
വില പറഞ്ഞുറപ്പിക്കാത്ത
കുറേ മനുഷ്യ ജന്മങ്ങൾ.
കാലത്തിൻ വേഷം കെട്ടലുകളിഴിച്ച-
യീ നഗ്നസത്യങ്ങൾക്കിടയിൽ
ഒരു കലാപത്തിൻ
ചോരചിതറിയ തെരുവിലൂടെ
തൊലിയുരിക്കപ്പെട്ട
എന്റെ യൌവനം പാഞ്ഞുപോയി.
പകൽ കാഴ്ചകൾ മാത്രമവശേഷിക്കുന്ന
ഇനിയും കണ്ടുപിടിക്കപ്പെട്ടിട്ടില്ലാത്ത
ഒരു നഗരമദ്ധ്യത്തിലേയ്ക്ക്.